Cyfrol i Roi Telynorion ar Ben Ffordd

Yn sgil galw gan ddarpar delynorion mae’r Lolfa wedi mynd ati i ailargraffu gwerslyfr Mair Roberts Hwyl Gyda’r Delyn. Mae dros ugain mlynedd ers i’r Lolfa gyhoeddi’r gyfrol yn wreiddiol, ac fe sefydlodd ei hun fel y cydymaith safonol ar gyfer Cymry Cymraeg sydd am fynd ati i ddysgu chwarae’r delyn. Lluniwyd y gyfrol gan Mair Roberts, un o delynorion disgleiriaf Cymru, ac mae’r gwersi wedi eu graddio yn ofalus gyda 250 o ymarferion a darnau o gerddoriaeth draddodiadol a chyfoes, clasurol a phoblogaidd i ymarfer arnynt. Mae’r gyfrol yn cynnwys ffefrynnau Cymreig fel Croen y Ddafad Felen, Bedd Dafydd Ddu a Huna Blentyn yn ogystal ag alawon gan rhai o brif gyfansoddwyr y byd fel Brahms, Bach, Handel, Mozart a Scott Joplin.

Ganed Mair Roberts yn Hen Golwyn. Bu’n delynores broffesiynol mewn sawl cerddorfa yn cynnwys Cerddorfa Ffilharmonig Frenhinol Lerpwl, gan ymddangos fel unawdydd mewn nifer fawr o gyngherddau ac yn fynych ar y radio a’r teledu. Mae hi bellach yn byw yn Rhuthun. 

Bu’r gyfrol allan o brint am ryw ddeng mlynedd ond mae wastad galw wedi bod amdano. Mae’r argraffiad newydd wedi ei rwymo yn sbeiral i sicrhau ei fod yn agor yn fflat ac yn rhwydd. Bydd y gyfrol yn anhepgorol i unrhyw un, o unrhyw oed, sydd am roi cynnig ar ddysgu chwarae’r delyn, a bydd y casgliad o alawon yn siŵr o blesio telynorion dibrofiad sydd am ehangu eu repertoire.

Hwyl Gyda'r Delyn 

Y Kindle yn parhau i wrthod cydnabod elyfrau Cymraeg

Bellach mae tua hanner cant o lyfrau Cymraeg y Lolfa ar gael ar y Kindle ond yn anffodus mae Amazon yn parhau i wrthod cydnabod yr iaith Gymraeg. Mae’r llyfrau Cymraeg sydd ar werth ar y Kindle wedi gorfod cael eu llwytho fel llyfrau Saesneg ac fel arfer mae’r llyfrau Cymraeg yn cael eu gwrthod am nad ydynt yn adnabod yr iaith (mae’r system checio sydd ganddynt yn eitha chwit chwat - felly mae rhai llyfrau Cymraeg wedi llithro drwy’r rhwyd). Mae Amazon, fodd bynnag, yn cydnabod Catalwneg, Basgeg a Galiseg ac mae modd cyhoeddi elyfau ar gyfer y Kindle yn yr ieithoedd yma yn ddi-drafferth, heb orfod ceisio darganfod rhyw ddrws cefn ac esgus eu bod yn lyfrau Saesneg. Gweler isod y dewis o ieithoedd sydd ar gael wrth i ni lwytho llyfrau ar wefan KDP.

 

Rydym fel gwasg wedi cysylltu droeon gydag Amazon i gwyno am hyn ac wedi derbyn negeseuon annelwig yn sôn eu bod yn edrych i mewn i’r mater. Er mwyn cael y maen i’r wal byddwn yn gwerthfawrogi yn fawr petai modd i bobl sy’n defnyddio’r Kindle i gwyno am eu hamharodrwydd i gydnabod y Gymraeg a gwerthu llyfrau Cymraeg. Does dim rheswm yn y byd pan na ddylai KDP gefnogi llyfrau yn yr iaith Gymraeg yn yr un modd ag y maent yn cefnogi ieithoedd “llai eu defnydd” yn Sbaen.

Mae yna nifer o declynnau darllen elyfrau ar gael  heblaw am y Kindle (e.e. Kobo, Nook, Sony ayb) a dyw’r rhain ddim yn gwahaniaethu yn erbyn y Gymraeg. Os na fydd Amazon yn newid eu polisi  efallai mai dim ond drwy’r teclynnau hyn y bydd modd prynu elyfrau Cymraeg yn y dyfodol. Nid yw'r Lolfa wedi llwyddo i gael llyfrau Cymraeg newydd ar y Kindle ers canol Awst.

Dyma ambell i linc:

Llyfrau’r Lolfa sydd ar y Kindle http://www.amazon.co.uk/s/ref=sr_pg_4?rh=n%3A341677031%2Ck%3Alolfa&page=4&keywords=lolfa&ie=UTF8&qid=1347614992

Un o lyfrau Cymraeg y Lolfa wedi ei wrthod gan Kindle (gweler y neges mewn melyn, sylwer hefyd taw Saesneg yw iaith y llyfr) http://www.amazon.co.uk/Awr-y-Locustiaid-ebook/dp/B008SC0RCS/ref=sr_1_13?ie=UTF8&qid=1347620625&sr=8-13

Elyfrau Catalaneg Amazon.es http://www.amazon.es/s/ref=amb_link_161711967_1?ie=UTF8&rh=n%3A1336310031&page=1&pf_rd_m=A1AT7YVPFBWXBL&pf_rd_s=left-1&pf_rd_r=0D6E7WGBD0D494JJN2V6&pf_rd_t=101&pf_rd_p=295982647&pf_rd_i=827231031

Lansiad Blasus Nofel Newydd Manon Steffan Ros

Yr awdures gyda'i nofel newydd

Cynhaliwyd lansiad hynod lwyddiannus yn Llyfrgell newydd y Dref, Aberystwyth nos Fercher yr 16eg o Fai wedi i haid ymgasglu i ddathlu cyhoeddi Blasu, nofel newydd Manon Steffan Ros. Yn ogystal â dathlu’r nofel newydd, roedd hi hefyd yn noson arbennig yn hanes y llyfrgell, gan mai dyna’r digwyddiad cyntaf i’w chynnal yno ers iddi agor ei drysau am y tro cyntaf ar ddechrau’r mis.

Croesawyd pawb wrth y drws gyda gwydraid o win a dewis o gacennau lu, danteithion a baratowyd yn arbennig gan yr awdures ei hun gan ddefnyddio’r ryseitiau sydd i’w cael yn y nofel, yn ogystal â chacennau bach gan gogyddes ifanc leol, Mari Elin Morgan, sydd wedi sefydlu busnes pobi ei hun yn ddiweddar, Sleisen o Deisen.

Manon Steffan Ros, Nia Peris a Branwen Rhys Huws yn mwynhau eu cacennau!

“Dwi wastad wedi bod dros fy mhen a’m clustiau mewn cariad efo bwyd,” cyfaddefodd Manon Steffan Ros yn y lansiad. “Mae fy atgofion hefyd ynghlwm â pha bynnag fwyd oedd o gwmpas ar y pryd – mae fy ngŵr yn fy herian i am ’mod i’n cofio’n union pa bryd ges i mewn bwyty ddeng mlynedd yn ôl, ond yn methu cofio lle dwi ’di rhoi fy ngoriadau! Mae bwyd yn brofiad emosiynol i mi, mae o’n un o’r ffyrdd dwi’n dangos cariad.”

Ond er bod pob pennod yn dechrau gyda rysáit wahanaol, prysurodd Manon i bwysleisio nad llyfr ryseitiau yw’r nofel, ond cyfle i ddarllenwyr flasu a phrofi’r un pethau â’r prif gymeriad, Pegi. Wrth ddewis a dethol y ryseitiau ar gyfer y nofel, cyfrannodd Manon ambell un sy’n agos at ei chalon – gan gynnwys pwdin barlys roedd ei hen hen nain yn ei baratoi bob bore ar gyfer naw o blant, a rysáit am grempogau ceirch ei nain o ochr arall y teulu.

“Mi fues i’n pendroni am hydoedd a ddylwn i ddewis ryseitiau ro’n i’n gwybod oedd yn boblogaidd a thrin y nofel fel cyfle i arddangos fy hoff fwyd. Ond, yn y diwedd, roedd amgylchiadau Pegi yn llywio’r ryseitiau.”

“Mae cael perthynas gymhleth efo bwyd bron â bod yn norm erbyn hyn,” eglurodd Manon. “Dwi’n synnu faint o bobl sydd wedi dioddef o ryw anhwylder bwyta yn ystod eu bywydau, ac erbyn heddiw rydan ni’n gweld bwydydd fel rhai da neu ddrwg. Wrth gwrs, mae hyn yn golygu bod bwyd a bwyta’n brofiad emosiynol – tydi o ddim yn fater o fwynhau neu gasáu, mae o’n weithred o ddrygioni neu ddaioni.”

Dyma ail nofel yr awdures i oedolion, a hynny’n dilyn llwyddiant ei nofel gyntaf i oedolion, Fel Aderyn, enillydd gwobr Barn y Bobl Golwg 360 yng Ngwobrau Llyfr y Flwyddyn yn 2010. Yn yr un flwyddyn fe enillodd Manon Wobr Tir na-Nog am Trwy’r Tonnau, nofel i blant a phobl ifanc, ac mae ei nofel ddiweddaraf i bobl ifanc Prism, wedi cyrraedd rhestr fer Gwobr Tir na-Nog 2012.

Manon yn llofnodi copi i'w ffrind, Gwen Gruffudd

Bedwen Lyfrau'r Bala

Yn yr un modd ag mae Steddfod y Bala wastad yn un dda roedd Bedwen lyfrau 2012 a gynhaliwyd yn Neuadd Cyfnod y Bala ymhlith y goreuon (roedd rhai Llanrwst a Chrymych yn rhai cofiadwy iawn hefyd).

Un o’r uchafbwyntiau oedd trafodaeth rhwng sêr y byd llyfrau Bethan Gwanas, Dewi Prysor, Haf Llywelyn a Manon Steffan Ros (sydd newydd gwblhau ei nofel newydd Blasu) am y broses o ysgrifennu. Dim un ohonynt wedi dilyn y trywydd arferol…

Uchafbwynt arall oedd y cacennau a’r te gan aelodau Merched y Wawr oedd yn dathlu cyhoeddi llyfr newydd i ddathlu eu penblwydd. Pwy all anghytuno â Meri Huws “Lle fyddai Cymru heb Ferched y Wawr, dywedwch?”

Ymlaen yn awr am Felinfach 2013 os byw ac iach.

Dyma ambell i lun i roi blas o’r achlysur

Dathlu Rygbi Llawr Gwlad

Mae'r Lolfa newydd ryddhau cyfrol o luniau sy'n portreadu ac yn dathlu rygbi ar lefel gymunedol. Mae Rygbi: Calon y Gymuned yn gyfrol unigryw fydd pawb sydd naill ai wedi chwarae neu gefnogi rygbi yn gallu ei fwynhau a’i werthfawrogi. Mae hefyd yn gofnod ac yn ddathliad o fywyd cymunedol Cymreig ar ei orau gan bortreadi’r cymeriadau anfarwol a’r gwirfoddolwyr diflino sy’n ymwneud â rygbi lleol. Cafodd dros 3,000 o luniau eu tynnu gan Alice Carfrae, Luke Ball a Steven Pepper, myfyrwyr ym Mhrifysgol Cymru Casnewydd - mae’r gyfrol yn gasgliad o’r goreuon ac yn cynnwys lluniau yn y clybiau yma: Abergwaun, Aberteifi, Y Pil, Porthcawl, Taibach, Gwernyfed, Y Coed Duon, Cil-y-coed, Aberhonddu, Aberdar, Ynysddu, Merched Croesyceiliog, Shotton a Bangor. Dyma ambell i lun o'r llyfr.